Ahilyanagar News : एक व्यक्तीने पोलीस ठाण्यात फोन करून महिला पोलिस कर्मचाऱ्यासह इतर कर्मचारी व वरिष्ठ अधिकाऱ्यांना शिवीगाळ करत प्रशासकीय अधिकारी, राजकीय नेत्यांना बॉम्बस्फोट करून उडवून देण्याची धमकी दिल्याची घटना शुक्रवारी सायंकाळी घडली. यामुळे पोलिसांनी तात्काळ तपास करत या प्रकरणी भाऊसाहेब नारायण शिंदे (रा. चिचोंडी पाटील) याच्याविरोधात कोतवाली पोलिस ठाण्यात गुन्हा दाखल करून त्याला अटक केली.
महिला पोलिस कर्मचारी पोलिस ठाण्यात कामावर असताना तेथील स्वतःचे नाव भाऊसाहेब शिंदे असे सांगत संबंधित कर्मचाऱ्याला अश्लिल भाषेत शिवीगाळ केली. या महिला कर्मचाऱ्याने हा प्रकार सहकारी कर्मचाऱ्यांना सांगितला. त्यानंतर पोलिस ठाण्यातील दुसऱ्या कर्मचाऱ्याने या व्यक्तीला फोन केला असता, त्या कर्मचाऱ्यालाही त्याने शिवीगाळ केली.
पोलिस ठाण्यातील इतर अधिकारी व विविध वरिष्ठ पोलिस अधिकारी, राजकीय नेत्यांची नावे घेऊन त्याने शिवीगाळ केली. प्रशासकीय अधिकारी व राजकीय नेत्यांना बॉम्बस्फोट करून उडवून देईल, अशी धमकीही त्याने दिल्याचे फिर्यादीत म्हटले आहे.
दरम्यान, शिंदे याला कोतवाली पोलिसांनी ताब्यात घेऊन त्याला पोलिसी खाक्या दाखवला. या व्यक्तीने यापूर्वीही जिल्ह्यातील इतर काही पोलिस ठाण्यात, वरिष्ठ अधिकाऱ्यांना अशाच पद्धतीने फोन करून शिवीगाळ केली होती.
त्याच्याविरोधात यापूर्वी नेवासा पोलिस ठाण्यात गुन्हा दाखल आहे, तो मुंबईत नोकरीला होता व एका चौकशी प्रकरणात त्याची नोकरी गेली. तेव्हापासून तो पोलिस खात्याविरोधात असलेल्या रागातून असे कृत्य करत असल्याचे सांगण्यात आले. त्याला नोटीस बजावून सध्या त्याला सोडून देण्यात आले आहे.
