कृषी विभागामार्फत रब्बी हंगाम २०२४ मध्ये सर्वसाधारण व आदिवासी गटासाठी ज्वारी, गहू, हरभरा, करडई व जवस या पिकांसाठी पीक स्पर्धा आयोजित केली आहे.शेतीची उत्पादकता वाढविण्यासाठी,शेतकऱ्यांना प्रोत्साहन देण्यासाठी कृषी विभागाकडून पीक स्पर्धा घेण्यात येते.
या स्पर्धेत जास्तीत जास्त शेतकऱ्यांनी सहभागी व्हावे व बक्षिसे मिळवावीत,असे आवाहन जिल्हा अधीक्षक कृषी अधिकारी सुधाकर बोराळे यांनी केले आहे.राज्यामध्ये पिकाची उत्पादकता वाढविण्यासाठी विविध भागांमध्ये शेतकऱ्यांकडून विविध प्रयोग करण्यात येतात व उत्पादकतेत वाढ करण्यात येते.
अशा प्रयोगशील शेतकऱ्यांना मिळालेल्या उत्पादकतेबाबत प्रोत्साहन देण्यासाठी राज्यांतर्गत पीक स्पर्धा योजना राबविण्यात येते.पीक स्पर्धेमध्ये सहभाग घेणाऱ्या शेतकऱ्याची स्वतःच्या शेतावर त्या पिकाखाली किमान ४० आर.क्षेत्रावर सलग लागवड असणे आवश्यक आहे.पीक स्पर्धा तालुका, जिल्हा व राज्यपातळीवर राबविण्यात येत आहे.
शेतकऱ्यांनी पीक स्पर्धेत भाग घेऊन एकरी जास्तीत जास्त उत्पादन घ्यावे, असा या योजनेमागे राज्य शासनाचा उद्देश आहे. यामुळे शेतकऱ्यांना हाती चार पैसेही चांगले मिळतील.कृषी विभागामार्फत रब्बी हंगाम २०२४ मध्ये सर्वसाधारण व आदिवासी गटासाठी ज्वारी, गहू, हरभरा, करडई व जवस या पिकांसाठी पीक स्पर्धा आयोजित केली आहे.
सर्वसाधारण व आदिवासी गटातील शेतकऱ्यांसाठी तालुका पातळीवर ५ हजार, ३ हजार व २ हजार रुपये असे अनुक्रमे पहिले, दुसरे व तिसरे बक्षीस असेल. जिल्हा पातळीवर १० हजार, ७ हजार व ५ हजार रुपये तर राज्य पातळीवर प्रथम ५० हजार, द्वितीय ४० हजार तसेच तृतीय ३० हजार रुपये बक्षीस असेल.
स्पर्धेसाठी प्रवेश शुल्क प्रत्येक पिकासाठी स्वतंत्र सर्वसाधारणगटासाठी रक्कम रुपये ३०० व आदिवासी गटासाठी रक्कम रुपये १५० असेल, स्पर्धेत भाग घेण्यासाठी शेतकऱ्याकडे स्वतःच्या नावावर जमीन असणे व ती जमीन तो स्वतः कसत असणे आवश्यक आहे.शेतकऱ्याला एकाच वेळी एकापेक्षा जास्त पिकांसाठी स्पर्धेत सहभाग घेता येईल.
या स्पर्धेसाठी प्रवेश अर्ज करण्याची मुदत ३१ डिसेंबरपर्यंत आहे.अर्जासोबत विहित नमुन्यातील अर्ज (प्रपत्र-अ), ठरवून दिलेले प्रवेश शुल्क भरल्याचे चलन, ७/१२, ८-अ चा उतारा, जात प्रमाणपत्र (केवळ आदिवासी असल्यास), स्पर्धेसाठी शेतकऱ्याने संबंधित ७/१२ वरील घोषित केलेल्या क्षेत्राचा चिन्हांकित केलेला नकाशा आदी कागदपत्रे जोडावी.
अर्ज शेतकरी कृषी विभागाचे संकेतस्थळ www.krishi.maharashtra.gov.in किंवा संबंधित तालुका कृषी अधिकारी कार्यालयाकडे करू शकतात.
