कोपरगाव तालुक्यातील पोहेगाव परिसरातील नागरीकांना कोपरगाव येथे जाण्यासाठी सध्या खड्डेमय रस्त्याचा सामना करावा लागत आहे.झगडे फाटा ते रांजणगाव देशमुख रस्त्याची दुरावस्था झालेली असून त्यात झगडे फाटा ते पोहेगाव पर्यंतच्या रस्त्याने प्रवास करणे धोक्याचे बनले आहे.
या रस्त्याच्या कामासाठी दोन वेळा निधी मिळवून देखील रस्त्याची दुर्दशा झाल्यामुळे नागरीक हैराण झाले आहे.त्यामुळे लोकप्रतिनिधींनी या संदर्भात लक्ष घालण्याची गरज निर्माण झाली आहे.
या रस्त्याचे खड्डे चुकवण्यापेक्षा पोहेगाव परिसरातील नागरीकांनी आता सोनेवाडी, चांदेकसारे मार्गे कोपरगाव किंवा पोहेगाव,देर्डे कोऱ्हाळे मार्गे कोपरगाव,असा प्रवास सुरू केला आहे.
झगडे फाटा ते पोहेगाव या तीन किलोमीटर अंतरावर सरपंच किरण होन यांची वस्ती ते पोहेगाव,या दरम्यानच्या रस्त्यावर शेकडो मोठ-मोठे खड्डे पडलेले आहे.दोनदा या रस्त्याच्या कामासाठी निधी उपलब्ध झाला.
त्यामुळे ठेकेदाराकडून रस्त्याचे कामही करण्यात आले.मात्र कामाचा दर्जा व ठेवण योग्य नसल्याने रस्त्याची दुरावस्था झालेली आहे.या रस्त्यात् प्रचंड मोठ-मोठे खड्डे पडले असून श्री मयुरेश्वर देवस्थानच्या दर्शनासाठी देखील भाविकांना अनेक संकटांचा सामना करावा लागतो.
कोपरगाव येथे शासकीय कामासाठी पोहेगाव पंचक्रोशीतील नागरीक वरील पर्यायी रस्त्यांचा वापर करीत आहे.या रस्त्या संदर्भात अनेक सामाजिक कार्यकर्त्यांनी अनेकदा आंदोलन करून रस्त्यावर भाकरी भाजल्या,कंदील लावून रस्त्यात वाट शोधली.
मात्र तरी देखील प्रशासनाने कुठलीच दखल घेतलेली नाही.त्यामुळे आता या रस्त्याच्या बाबतीत लोकप्रतिनिधींनीच लक्ष घालून पोहेगाव पंचक्रोशीतील नागरीकांचा त्रास कमी करावा,अशी मागणी होत आहे.
