कृषि उत्पन्न बाजार समितीच्या मौजे मोर्विस (धामोरी फाटा) येथील उपबाजारास आमदार आशुतोष काळे,सहकार महर्षी शंकरराव कोल्हे सहकारी साखर कारखान्याचे अध्यक्ष विवेक कोल्हे, नामदेवराव अण्णा परजणे पाटील गोदावरी खोरे सहकारी दूध उत्पादक संघाचे अध्यक्ष राजेश परजणे,पोहेगाव नागरी पतसंस्थेचे अध्यक्ष नितीनराव औताडे यांचे प्रयत्नातून शासनाची मंजुरी मिळाली असल्याची माहिती सभापती साहेबराव रोहम यांनी दिली.
कोपरगाव कृषि उत्पन्न बाजार समितीच्या कार्यक्षेत्रात रवंदे, मोर्विस, धामोरी, चास, कोळपेवाडी या २० ते २५ गावांच्या परिसरातीस कांदा, भुसार व टोमॅटो या शेतीमालाचे उत्पादन मोठ्या प्रमाणात घेतले जाते.परंतु तेथील शेतकऱ्यांना त्यांचा शेतमाल विक्रीसाठी जवळ बाजारपेठ नसल्यामळे शेतमाल विक्रीसाठी त्यांना २५ ते ३० किलोमीटर अंतरावर असलेल्या मार्केटवर जावे लागते.
त्यामुळे शेतकऱ्यांचा वाहतूक खर्च वाढतो व त्यांचा वेळही वाया जातो.याचा गैरफायदा घेऊन या परिसरात बाहेरील व्यापारी सोयाबीन, गहू, मका, कांदा काढण्याच्या वेळी शेतकऱ्यांच्या वजन मापात १ ते २ किलोचा नियमबाहय काटला घेतात. शेतकऱ्यांची भावात व पेमेंटमध्ये बऱ्याच वेळा फसवणूक केली जाते. परिसरातील शेतकऱ्यांची वजनमापाची व भावाची फसवणूक टाळण्यासाठी संचालक मंडळाने निर्णय घेऊन मौजे मोर्विस (धामोरी फाटा) येथे उपबाजार सुरू करण्यासाठी शासनास प्रस्ताव पाठवला होता.
त्याला शाासनाने परवानगी दिल्याचे रोहम व उपसभापती गोवर्धन परजणे यांनी दिली.या उपबाजारामुळे परिसरातील शेतकऱ्यांना व व्यापाऱ्यांना शेतमाल खरेदी-विक्रीस आणण्यासाठी अंतर कमी होऊन त्यांच्या वेळेत व खर्चात बचत होईन. तसेच परिसरातील शेतमाल खरेदी विक्रीच्या अनधिकृत व्यवहारास प्रतीबंध बसेल.
उपबाजाराचे ठिकाण हायवे लगत असल्याने शेतमाल आणणे सोईचे होईल.उपबाजार आवाराचे उदघाटन लवकरात लवकर करण्यात येणार असल्याचे परजणे यांनी सांगितले.उपबाजार आवार मोर्विस येथे बाजार समितीला कांदा, भुसार व टोमॅटो या शेतीमालाच्या लिलावाचे कामकाज सुरू करायचे असून खरेदीदार व आडते व्यापारी यांना व्यापाराच्या परवान्यासाठी बाजार समितीच्या अटी व शर्तीनुसार परवाने द्यावयाचे असून त्यासाठी इच्छुक असणाऱ्या व्यापाऱ्यांनी कृषी उत्पन्न बाजार समितीकडे संपर्क करण्याचे आवाहन सचिव नानासाहेब रणशूर यांनी केले आहे.
