दिवसेंदिवस पारनेर तालुक्यातील बिबट्यांची संख्या लक्षणीय वाढली असून,भक्षाच्या शोधासाठी बिबटयांकडून आता मानवी वस्त्याही लक्ष्य केल्या जाऊ लागल्या आहेत.असाच भक्षाच्या शोधात निघोजच्या लामखडे वस्तीवर आलेला बिबटया कोंबडयांच्या खुराडयात अडकला असून,वनविभागाच्या कर्मचाऱ्यांनी त्याला जेरंबद करण्यासाठी युध्दपातळीवर प्रयत्न करत पकडले आहे.
याबाबतची माहिती अशी की, निघोजच्या कुंड परिसरातील कोळीवाडा हॉटेलच्या पाठीमागे गणेश लामखडे यांची शेती आहे.या शेतीमधील उसाच्या फडालगत असलेल्या कोंबडयांच्या खुराडयातील कोंबडयांना बिबट्याने सोमवारी रात्रीच्या सुमारास लक्ष्य केले.
कोंबडया फस्त करण्यासाठी गेल्यानंतर खुराडयात उतरलेल्या बिबटयाला बाहेर पडणे मुश्किल झाले.तो बाहेर येणाचा प्रयत्न करत होता; परंतू त्याचे प्रयत्न अपुरे पडले.कोंबडयांच्या खुराडयात बिबट्या असल्याचे लामखडे परिवारातील सदस्यांच्या सोमवारी सकाळी ११ वाजण्याच्या सुमारास लक्षात आहे.
खुराडयाबाहेर पडण्याची तो धडपड करत होता, त्यामुळे तिथे जमलेल्या व्यक्तींनी तिथून लांब जाण्याचा निर्णय घेतला. यासंदर्भात वन विभागाचे वनपरीक्षेत्र अधिकारी गजानन धाडे यांना माहिती देताच वन विभागाचे अधिकारी तसेच कर्मचाऱ्यांनी घटनास्थळी धाव घेतली.
वनपरिक्षेत्र अधिकारी गजानान धाडे, वनपाल रेश्मा पाठक, पाठक, वनरक्षक संदीप कार्ले, तसेच साबळे,शेख, सातपुते, वाढवणे यांनी घटनास्थळी भेट देऊन पाहणी केली असता, त्यासाठी बचाव पथकाची आवष्यकता असल्याचे स्पष्ट झाले. त्यानंतर बिबटयाला पकडण्यासाठी संगमनेर येथून बचाव पथक पाचारण करण्यात आले.बचाव पथकाचे अथक परिश्रम उशिरापर्यंत सुरू होते.
सकाळी दहाच्या दरम्यान अडकलेल्या बिबट्याला फासात अडकल्याने बाहेर येता येईना. पारनेरच्या वनसंरक्षक पथकाने संगमनेर येथील बचाव पथकाला पाचारण केले.शेवटी दुपारी चार ते पाचच्या दरम्यान या बचाव पथकाने या बिबट्याला गुंगीचे इंजेक्शन देऊन पिंजऱ्यात अडकवले.
कुंड परिसरात तसेच शेजारील वस्तीवर गेल्या पंधरा दिवसांत बिबट्याने शंभरपेक्षा जास्त कोंबड्या, पंचवीसपेक्षा जास्त कुत्रे, शेळ्या फस्त केल्या.मात्र,मंगळवार (दि.३) रोजी कोंबड्यांच्या अपेक्षेने आलेला बिबट्या शेतकऱ्यांनी खुराड्याभोवती काटेरी फास टाकल्याने त्यात अडकवले.या कुंड वस्तीवर दोन ते तीन बिबटे असण्याची शक्यता शेतकरी वर्तवत आहेत. त्यांचा तातडीने बंदोबस्त करण्यासाठी पिंजरे देण्याची मागणी शेतकऱ्यांनी केली आहे.
तालुक्यातील सिध्देश्वरवाडी येथील एका शेतकऱ्यावर बिबट्याने हल्ला करून त्यांना जखमी केल्याची घटनाही ताजी आहे.या शेतकऱ्याला औषधोपचारासाठी रुग्णालयात दाखल करण्यात आले आहे.या घटनेचा वनविभागाच्या अधिकाऱ्यांनी पंचनामा केला असून, लवकरच शेतकऱ्यास वन विभागाच्या वतीने भरपाई देण्यात येणार असल्याचे सांगण्यात आले.
