Ahilyanagar news : सध्या जिल्ह्यात मोठ्या प्रमाणात चोऱ्या, खून, दरोडे यांचे प्रमाण वाढलेले आहे. त्यामुळे पोलिसांचा वचक कमी झाला असल्याचे चित्र दिसत आहे. कारण जिल्ह्यात रोज चोरी, खून ,अत्याचार आदी घटना घडत आहेत.
सुमारे दोन महिन्यांपूर्वीच राहुरी तालुक्यातील बारागाव नांदूर परिसरात एका अनोळखी तरुणाचा घातपात करुन आणून टाकलेला मृतदेह आढळून आला होता. त्या मृतदेहाची अद्याप ओळख पटली नसल्याने त्या तपासाला खीळ बसली. ही घटना परिसरातील नागरिक विसरत नाहीत तोच परत सोमवारी याच भागात पून्हा एक अनोळखी मृतदेह आढळून आल्याने खळबळ उडाली आहे.
राहुरी शहर हद्दीत राहुरी व देसवंडी रस्त्यावर मुळा नदीपात्रात सोमवारी दुपारच्या दरम्यान एका नग्न अवस्थेत असलेला अनोळखी इसमाचा मृतदेह आढळून आला. या घटनेमुळे तालूक्यात प्रचंड खळबळ उडाली असून या भागात असे प्रकार वारंवार घडत असल्याने नागरिक देखील भयभीत झाले आहेत.
सोमवारी दुपारी बारा वाजे दरम्यान राहुरी शहर हद्दीत राहुरी व देसवंडी रस्त्यावर मुळा नदीपात्रात रस्त्यापासून सुमारे १०० फूट अंतरावर पानाडामध्ये मृतदेह आढळून आला. सदर मृतदेह हा नग्न अवस्थेत असून कुजलेल्या अवस्थेत आहे.
सदर मृतदेह महिलेचा आहे कि पुरुषाचा हे समजू शकले नाही. घटनेची माहिती मिळताच पोलिस निरीक्षक संजय ठेंगे, सहाय्यक फौजदार तुळशीदास गिते, हवालदार संदिप ठाणगे, आजिनाथ पाखरे, अशोक शिंदे, प्रमोद ढाकणे, सचिन ताजणे, सतिष कुऱ्हाडे, अंकुश भोसले आदि पोलिस पथकाने घटनास्थळी धाव घेऊन मृतदेहाची पाहणी केली. तसेच पुढील तपास सुरु केला.
सदर मृतदेह कोणाचा, त्याची हत्या झाली कि आणखी काही, कोणत्या कारणाने खून झाला असावा. अशा वेगळ्या चर्चेला उधाण आले आहे. या घटनेतील मृतदेहाची ओळख पटविणे तसेच या गुन्ह्याचा तपास लावणे, हे पोलिस प्रशासना समोर एक आव्हानच आहे.
दरम्यान अद्याप यापूर्वीच्या घटनेतील मृतदेहाचीच ओळख पटवण्यात पोलिसांना यश आलेले नसतानाच परत एक असाच बेवारस मृतदेह आढळून आल्याने पोलिसांच नागरिक देखील या वारंवार घडणाऱ्या घटनांमुळे चक्रावून गेले आहेत.
