Ahilyanagar News : अहिल्यानगर जिल्ह्यातील राहुरी तालुक्यातील मानोरी येथील ऍड.राजाराम आढाव आणि त्यांची पत्नी ऍड. मनीषा आढाव यांचे अपहरण केले नंतर त्यांच्या डोक्यात प्लास्टिक पिशवी घालून, त्यांचे हात- पाय साडीने बांधून, त्याला दगडाची गोणी बांधून त्यांना उंबरे गावातील स्मशानभूमीजवळ विहिरीत टाकले. अशी माहिती माफीचा साक्षीदार हर्षल दत्तात्रय ढोकणे याने न्यायालयासमोर सांगितले.
ऍड.आढाव यांच्या एटीएममधून काही रक्कम संशयित आरोपींनी काढून घेतली, ऍड.आढाव यांच्या पत्नीच्या हातातील ब्रेसलेट काढून घेतल्याचे देखील माफीचा साक्षीदार ढोकणे याने सांगितले. दरम्यान संशयित आरोपीच्या वकिलांकडून ढोकणे याची उलट तपासणी सुरू झाली आहे.यावेळी ढोकणे याने मला या कृत्याचा पश्चाताप झाला असून त्यामुळे मी माफीचा साक्षीदार झालो असून हि माहिती देत असल्याचे सांगितले.
राहुरीतील वकील दाम्पत्याच्या खून प्रकरणी पोलिसांनी मुख्य संशयित आरोपी किरण उर्फ दत्तात्रय नानाभाऊ दुशिंग (वय ३२, रा. उंबरे, ता. राहुरी), भैया उर्फ सागर साहेबराव खांदे (रा. येवले आखाडा, ता. राहुरी), शुभम संजीत महाडिक (रा. गणपतवाडी शाळेजवळ, मानोरी, ता. राहुरी), हर्षल दत्तात्रय ढोकणे (रा. उंबरे, ता. राहुरी), कृष्णा उर्फ बबन सुनील मोरे (रा. राहुरी) यांना अटक केलेली आहे.
सोमवारी प्रधान जिल्हा न्यायाधीश अंजू शेंडे यांच्यासमोर या खटल्याची सुनावणी सुरू झाली. सरकार पक्षाकडून ऍड. उज्ज्वल निकम व मुख्य संशयित आरोपी किरण दुशिंग याच्या वतीने ऍड. सतीश वाणी यांनी बाजू मांडली. माफीचा साक्षीदार हर्षल ढोकणे याने न्यायालयासमोर वकील दाम्पत्याचे अपहरण कसे केले, यात कोणकोण सहभागी होते, कट कसा रचला याचा घटनाक्रम सांगितला होता.
मंगळवारी ढोकणे याने पुढील घटनाक्रम सांगितला. आढाव दाम्पत्याला त्यांच्याच घरात बाधून ठेवले होते. तेथे त्यांच्याकडून एटीएम कार्ड घेऊन पैसे काढून घेतले. हातातील ब्रेसलेट काढून घेतले, न्यायालयात या दोन्ही वस्तू ढोकणे याने ओळखल्या संशयित आरोपींनी आढाव यांच्याकडे अधिक रकमेसाठी तगादा लावला.
त्यानंतर आढाव यांचेच वाहन घेऊन त्यांना मध्यरात्री एक वाजण्याच्या सुमारास उंबरे येथील स्मशानभूमी येथे आणले. त्यांचे हात-पाय बांधले, दगडाची गोणी बांधून विहिरीत टाकले. तेथून आढाव यांचे वाहन राहुरी न्यायालयाच्या आवारात आणून लावले. संशयित आरोपी तेथून जात असताना तेथे पोलिसांचे एक वाहनही आले होते, असे ढोकणे याने सांगितले.
त्यानंतर माफीचा साक्षीदार ढोकणे याची संशयित आरोपीचे वकील सतीश वाणी यांनी उलटतपासणी सुरू केली. मी न्यायदंडाधिकारी यांनी नोंदविलेला जबाब वाचून पाहीला होता.
मी २७ जानेवारी २०२४ रोजी संध्याकाळी आठ वाजेपर्यंत पोलिसांच्या ताब्यात होतो. मला त्यांनी गुन्ह्याबद्दल विचारपुस केली होती. त्या चौकशीदरम्यान माझेकडून काहीही लिहून घेतले नव्हते. एलसीबीने मला गुन्हासंबंधी कबुली जबाब द्यायचा का असे सांगितले नव्हते. मी पोलिसांना सांगीतले होते की, मला पश्चाताप झाला आहे, असे ढोकणे याने सांगितले.
