Ahilyanagar News : महाराष्ट्रातून पावसाने आता पूर्णतः माघार घेतली आहे. त्यामुळे सध्या थंडीचा जोर वाढताना दिसून येत आहे. राज्यात सकाळी थंडी दुपारी उष्णता आणि रात्री पुन्हा थंडी असं वातावरण दिसून येतंय. आजपासून थंडीचा कडाका आणखी वाढणार, असा अंदाज हवामान विभागाने वर्तवला आहे. त्यामुळे सर्वच ठिकाणी आता शेकोट्या पेटण्यास सुरुवात झाली आहे.
पुढील २४ तासांमध्ये धुक्याचं प्रमाण वाढणार असून, थंडीचा कडाकाही वाढणार आहे. येत्या काळात राज्यात गारठा आणखी वाढणार असल्याचा इशारा हवामान विभागाने दिला आहे.
महाराष्ट्रात तापमानात मोठी घट झाल्याची दिसून येत आहे. येथे किमान तापमानाचा आकडा १५ अंशांवर आला आहे. सकाळी आणि रात्री गारठा वाढला आहे, तर दुपारी उष्णता वाढल्याने उकड्यामुळे नागरिक हैराण होत आहेत. थंडीचा जोर वाढणार असल्याने नागरिकांनी योग्य ती काळजी घेण्याचं आवाहन देखील हवामान विभागाकडून करण्यात आलं आहे.
यावर्षी राज्यात जून महिन्याच्या सुरुवातीपासूनच पाऊस सुरु झाला होता. यावर्षी राज्याच्या बहुतांश भागात चांगला पाऊस झाला आहे. आता पाऊस राज्यातून पूर्णपणे नाहीसा झाला आहे. त्यामुळे थंडी वाढण्यास सुरुवात झाली आहे. जवळपास सर्वच भागात तापमानात आता घट होताना दिसत आहे.
उत्तर भारतातील अनेक राज्यांमध्ये सध्या दाट धुक्याची चादर पसरली आहे. दिल्ली, बिहारमध्ये प्रचंड धुके पहाटे दिसून येत आहे. त्यातच राजधानी दिल्लीत आधीच प्रदूषण आणि त्यात दाट धुक्याची चादर पसरल्याने येथील हवेची गुणवत्ता खूप घसरली आहे. सकाळी घराबाहेर पडणेदेखील येथे अवघड झाले आहे.
मागील काही दिवसांपासून थंडीचा जोर कमालीचा वाढला आहे. त्यामुळे शहरात शेकोट्यासमोर बसलेले नागरिक दिसून येत आहे. ग्रामीण भागात घरासमोर व शेतात शेकोट्या पेटू लागल्या आहे. थंडीपासून बचाव करण्याकरिता नागरिकांनी उलन कपड्याचा वापर करणे सुरू केले.
दिवसभर थंडी जाणवत लागल्याने शहरातील रस्त्यांवर स्वेटर, जॉकेट आदी गरम कपडे परिधान केलेले नागरिक दिसून येत आहे. मॉर्निंग वॉकसाठी निघर्णाया नागरिकांची संख्याही या थंडीच्या कडाक्याने रोडावली आहे.
सायंकाळनंतर थंडीच्या प्रमाणात वाढ होत आहे. लोक सायंकाळी बाहेर पडणे टाळत आहेत. लहान बालक व वृद्ध नागरिकांना थंडीचा मोठा त्रास सहन करावा लागत आहे. दिवसाही कमालीची थंडी जाणवत आहे. बदलत्या वातावरणामुळे उपजिल्हा रुग्णांलय व खासगी रुग्णांलयात उपचारासाठी दवाखान्यात गर्दी दिसून येत आहे.
