Ahilyanagar News : संपूर्ण राज्याचे लक्ष लागून असलेल्या शिर्डी विधानसभा मतदारसंघात महायुतीचे उमेदवार महसूलमंत्री राधाकृष्ण विखे पाटील यांनी सलग आठव्यांदा विजय प्राप्त करीत १ लाख ४४ हजार ७७८ मते घेऊन प्रतिस्पर्धी काँग्रेसच्या उमेदवार प्रभावती घोगरे यांचा ७० हजार ५२१ मतांनी दारुण पराभव केला आहे.
पहिल्या फेरीपासूनच मंत्री राधाकृष्ण विखे पाटील यांनी हजारोंचे मताधिक्य मिळवत आघाडी घेतली. मत मोजणीच्या प्रत्येक फेरीमध्ये बेरजेंच्या मतांची आघाडी घेऊन मंत्री विखे पाटीलयांनी महाविकास आघाडी काँग्रेसच्या प्रतिस्पर्धी उमेदवार प्रभावती घोगरे यांना सर्वच्या सर्व फेऱ्यांमध्ये पिछाडीवर टाकले.
प्रत्येक फेरीमध्ये भारतीय जनता पार्टीचे उमेदवार मंत्री विखे पाटील यांच्या मताधिक्यात मोठ्या संख्येने वाढ होत गेली. शेवटच्या विसाव्या फेरीअखेर त्यांना एकूण १ लाख ४४ हजार ७७८ मते मिळाली, तर विरोधी काँग्रेसच्या उमेदवार प्रभावती घोगरे यांना ७४ हजार ४९६ मते मिळाली. यामध्ये मंत्री विखे पाटील यांनी घोगरे यांचा दारुण पराभव करून त्यांना व घोगरे यांच्यासाठी राजकीय पाठबळ देणाऱ्या माजी महसूलमंत्री बाळासाहेब थोरात यांना पराभवाचा जबर धक्का दिला.
या निवडणुकीत भाजपाचेबंडखोर अपक्ष उमेदवार डॉ. राजेंद्र पिपाडा यांनी प्रचारात आघाडी घेऊनसुद्धा त्यांना अवघे १ हजार ५१० मते मिळाली. त्यांचे डिपॉझिट जप्त झाले असून त्यांच्यासह इतर पाच उमेदवारांचे डिपॉझिट जप्त झाले आहे. मतमोजणीत विखे पाटील यांचे मताधिक्य प्रत्येक फेरीनिहाय मोठ्या संख्येने वाढत होते. तसे कार्यकर्ते बाहेर जल्लोष करीत होते.
स्वतः माजी खासदार डॉ. सुजय विखे पाटील मीडिया सेलमध्ये बसून राज्यभरातील निकाल बघत होते. शिर्डी मतदारसंघात मोठ्या मताधिक्याने विजय मिळवू व संगमनेरमध्ये थोरात यांचा पराभव करू, तसेच जिल्ह्यातून महाविकास आघाडीला सर्वत्र जबर धक्का देऊ, याचा आत्मविश्वास असल्याचे ते सांगत होते. मंत्री विखे पाटील यांच्या विजयाची घोषणा झाल्यानंतर कार्यकर्त्यांनी मोठा जल्लोष साजरा केला.
गुलालाची मुक्त उधळण करून फटाक्यांची जोरदार आतिषबाजी केली. डीजेच्या तालावर ठेका धरत मिरवणुकीने मंत्री विखे पाटील राहाता बाजार तळ येथे गेले. वीरभद्र महाराजांचे दर्शन घेऊन छत्रपती शिवाजी महाराजांच्या पुतळ्याला यावेळी त्यांनी पुष्पहार अर्पण केला.
कार्यकर्त्यांनी माजी खासदार डॉ. विखे पाटील, माजी जिल्हा परिषद अध्यक्ष शालिनीताई विखे पाटील, डॉ. राजेंद्र विखे पाटील, रणरागिणी महिला मंडळाच्या अध्यक्षा धनश्रीताई विखे पाटील, महानंदाचे चेअरमन राजेश परजणे यांच्या सोबत सेल्फी काढत व मंत्री विखे पाटील यांच्या विजयाच्या व ‘टायगर अभी जिंदा है’ च्या घोषणा देत विजयाचा आनंदोत्सव साजरा केला.
