Ahilyanagar News : तब्बल ७५ वर्षांपासून अहोरात्र धावत असलेल्या एसटीची अवस्था सध्या बिकट झाली आहे. अनेक बस जुन्या व कालबाहय झाल्या आहेत. त्यामुळे अनेकदा त्या रस्त्यातच बंद पडतात. तसेच भाग निकामी झाल्याने मोठा आवाज करतात. त्यामुळे एसटीचा प्रवास करताना प्रवासी नाक मुरडतात.
या विविध कारणांमुळे एसटीने प्रवास करणाऱ्यांची संख्या मोठ्या प्रमाणात घटली होती, मात्र आता सरकारने अनेक सुविधा दिल्याने काही प्रमाणात प्रवाशी एसटीचा प्रवास करत आहेत. मात्र आता नवीन वर्षात नवी लाल परी प्रवाशांच्या सेवेत दाखल होणार आहे.
एसटीचा प्रवास अधिक सुखकर आणि सुरक्षित करण्यासाठी नव्या वर्षात सुमारे ३,५०० नव्या साध्या लालपरी बसेस एसटीच्या ताफ्यात दाखल होण्याची शक्यता आहे. याबाबत एसटीचे अध्यक्ष व मंत्री भरत गोगावले यांनी घोषणा केली आहे. नागपूर येथे आयोजित पत्रकार परिषदेमध्ये त्यांनी याबाबत माहिती दिली.
सध्या एसटीकडे बसेसची प्रचंड कमतरता असून, एसटीच्या ताफ्यामध्ये आज रोजी १४ हजार बसेस असून कोरोनापूर्वी एसटीकडे तब्बल १८ हजार बसेस होत्या. परंतु गेल्या ३-४ वर्षांत एसटीला नव्या बसेस खरेदी करणे शक्य झाले नाही. त्यामुळे ताफ्यात असलेल्या अनेक बसेस जुन्या झाल्यामुळे त्या नादुरुस्त होण्याचे प्रमाण वाढले आहे.
त्यातच बसेसची संख्या कमी असल्याने महामंडळाकडून प्रवाशांना अतिरिक्त बस फेऱ्या देणे शक्य होत नाही. या सगळ्याचा विचार करून एसटीने स्वमालकीच्या २२०० बसेस खरेदी करण्याचा व १३०० बसेस भाडेतत्त्वावर घेण्याचा निर्णय घेतला आहे. या साडेतीन हजार बसेस जानेवारी महिन्यापासून एसटीच्या ताफ्यात समाविष्ट होतील.
त्यामुळे नवीन वर्षामध्ये प्रवाशांना रस्त्यात बस नादुरुस्त होणे, बसेसची दोन-दोन तास वाट पाहत बसणे, अशा तक्रारी कमी होतील, असे प्रतिपादन गोगावले यांनी यावेळी केले. राज्यातील सर्व बस स्थानकांचा टप्प्याटप्प्याने विकास करण्याची योजना महामंडळाने आखली असून, काही बस स्थानके शासनाच्या निधीतून, तर काही बस स्थानके बांधा वापरा-हस्तांतरीत करा या तत्त्वावर खासगी विकासकांकडून विकसित केली जाणार आहेत.
मागील सरकारच्या काळामध्ये तत्कालीन मुख्यमंत्री एकनाथ शिंदे यांच्या पुढाकाराने महाराष्ट्र औद्योगिक विकास महामंडळाच्या सहकार्याने राज्यभरातील १८३ बस स्थानक परिसराचे काँक्रीटीकरण करण्यास सुरुवात झाली होती. त्याला आता गती प्राप्त झाली असून, अहिल्यानगर बस स्थानकाचे देखील काम सुरु आहे.
भविष्यात जिल्ह्यातील एक देखणे बस स्थानक म्हणून अहिल्यानगर बस स्थानकाचा नावलौकिक होईल.
