Ahilyanagar News :रात्रीच्या वेळी चोरी करताना चोरट्यांना चोरी करण्यास विरोध करणाऱ्याचा खून केल्याची घटना पाथर्डी तालुक्यात घडली होती. मात्र आता यातील दहा आरोपींना मोक्का लावण्यात आला आहे. या शिक्षेमुळे मात्र संघटित गुन्हेगारी करून समाजात दहशत पसरविणाऱ्या आरोपींना चांगलीच चपराक बसली आहे.
यातील पाच आरोपींना अटक करून अहिल्यानगर येथील विशेष मोक्का न्यायाधीश बागल यांच्यासमोर हजर केले असता, त्यांना न्यायालयाने १० दिवसांची पोलीस कोठडी सुनावली आहे. ग्रामीणचे पोलिस उपाधीक्षक सुनील पाटील या प्रकरणाचा तपास करीत आहेत.
मोक्का लावण्याची तालुक्यातील ही दुसरी घटना आहे. यापूर्वी कोठेवाडी अत्याचार व दरोडा प्रकरणातील आरोपींना मोक्का लावण्यात आला होता. त्यांना न्यायालयाने शिक्षाही दिलेली आहे.
याबाबत अधिक माहिती अशी तालुक्यातील तिसगाव येथे मछिंद्र तुकाराम ससाणे (वय ७२), रा. भडकेवस्ती, शिरापूर रोड यांचा ६ सप्टेंबर २०२४ रोजी रात्री खून करण्यात आला होता.
या वेळी चोरट्यांनी चार कोंबड्या चोरल्या होत्या. ससाणे यांनी त्यांच्या पत्नीला चोरटे दमदाटी करीत होते, त्यामुळे ससाणे यांनी चोरट्यांना प्रतिकार केला, याचा राग येऊन एका चोरट्याने काही तरी धारदार शास्राने ससाणे यांच्या डोक्यात मारले. ते गंभीर जखमी झाले. उपचारासाठी घेऊन जाताना त्यांचा मृत्यू झाला.
यातील आरोपी उमेश रोशन भोसले व शिवाजी रोशन भोसले दोघे रा. हत्राळ रोड साकेगाव, ता. पाथर्डी, आकाश शेरू ऊर्फ लोल्या काळे, दौलत सुकनाश्या काळे, सिसम वैभव काळे सर्व (रा. वाळकेवस्ती, माळीबाभुळगाव) यांना पोलिसांनी अटक केली होती. हत्राळ रोडवरील एक विधी संघर्षित बालकाला ताब्यात घेतले होते.
मात्र, त्याला नगरच्या बाल न्यायालयातून घरी सोडून देण्यात आले होते. तर आज्या ऊर्फ बेडरूल सुरेश भोसले रा. टाकळीफाटा, बेऱ्या ऊर्फ किशोर रायभान भोसले (रा. हत्राळ रोड, साकेगाव, लोल्या ऊर्फ फैय्याज ऊर्फ शेरू सुकनाशा काळे (रा. माळी बाभुळगाव, ता. पाथर्डी, सेशन ऊर्फ रोशन ऊर्फ बल्लु रायभान भोसले (रा. हत्राळ रोड, साकेगाव), हे चौघेजण फरार आहेत. तपासात वरील आरोपींविरुध्द पाथर्डी येथे सहा, शेवगाव, सिलगाव व खुलताबाद येथे प्रत्येकी एक, असे विविध पोलिस ठाण्यांत नऊ गुन्हे दाखल आहेत.
