Ahilyanagar News : सध्या डिजिटल युगात सर्वकाही ऑनलाईन झाले आहे. त्यामुळे अवघ्या एका क्लीकवर आपण जगातील कोणत्याही ठिकाणाची काही क्षणातच माहिती घेऊ शिकतो. मात्र याच तंत्रज्ञाचा अनेकजण दुरुपयोग देखील करतात.
खोटी कंपनी सुरू करून येथील एका डॉक्टरला जादा व्याजाचे आमिष दाखवून त्यांच्याकडून बिटक्वॉईन घेवून त्याची फसवणूक केल्याचा प्रकार नुकताच समोर आला आहे. याप्रकरणी कोर्टाच्या आदेशानुसार येथील शहर पोलीस ठाण्यात पुणे येथील चार आरोपींवर गुन्हा दाखल करण्यात आला आहे, अशी माहिती पोलीस निरीक्षक नितीन देशमुख यांनी दिली.
याबाबत पोलिसांनी दिलेल्या माहितीनुसार, शहरातील डॉ.राम मोहनलाल कुकरेजा यांनी दिलेल्या फिर्यादीत म्हटले आहे की, आपलीऑनलाईन फोनद्वारे पुण्यातील अमित भारद्वाज नावाच्या इसमाशी ओळख झाली.
आरोपी याने आपल्याशी संपर्क करून माझी जीबी मायनिंग कंपनी असून तुम्ही माझ्याकडे तुमचे बिटकॉइन इन्व्हेस्ट केले तर तुम्हाला या गुंतवणूकीचा परतावा म्हणून १० टक्के बिटक्वॉईन देईल, असा विश्वास भारद्वाज याने दिला. त्याच्यावर विश्वास ठेवून आपण त्यांच्याकडे असलेल्या १७ बिटक्वॉईनपैकी अमित भारद्वाज याच्या कंपनीला १२.२२८३ बिटक्वॉईन ऑनलाईन ट्रान्सफर केले.
सदर बिटक्वॉईन इन्व्हेस्टमेंटचा मोबदला म्हणून भारद्वाज याने सुरूवातीचे सहा महिने डॉ. कुकरेजा यांना १० टक्के मोबदला दिला. त्यानंतर मोबदला बंद केला. म्हणून डॉक्टरांनी भारद्वाज याला अनेकदा संपर्क केला. परंतु, त्याने ऑनलाईन कॉल करून दाद दिली नाही.याबाबत सदर आरोपी व त्यांची जी.बी. मायनिंग कंपनीवर पुणे येथे तक्रार दिली.
त्यानुसार त्याच्यावर गुन्हा दाखल झाला. आरोपीला पुणे पोलिसांनी अटकही केली. आरोपी अमित भारद्वाज याने फिर्यादी डॉ. कुकरेजा यांच्या खात्यावरील बिटक्वॉईन पहिली, आरोपी अजय भारद्वाज व आरोपी विवेक भारद्वाज यांच्यासह एका महिला आरोपीच्या नावावर ट्रान्सफर करून सदर बिटक्वॉईन रक्कम हडपण्याचा व आपली फसवणूक करण्याचा इरादा ठेवून ते ट्रान्सफर केल्याचे फिर्यादीत म्हटले आहे.
या चारही आरोपींनी संगनमत करून खोटी कंपनी सुरु करून आपल्या बिटक्वॉईनची परस्पर विल्हेवाट लावली असल्याचे फिर्यादीत म्हटले असून सदर तक्रार सायबर सेलकडे दिल्यानंतर पोलिसांनी फिर्याद नोंदवली नाही. म्हणून डॉ. कुकरेजा यांनी येथील न्यायायालयात धाव घेतली.
अखेर न्यायालयाच्या आदेशानुसार आरोपी अमित भारद्वाज, अजय भारद्वाज, विवेक एम. भारद्वाज यांच्यासह एका महिला आरोपी (सर्व रा. विश्वधायरी, पुणे) विरूद्ध येथील शहर पोलीस ठाण्यात फसवणूकीचा गुन्हा दाखल करण्यात आला आहे.
