पारनेर शहरातील गणपती देवस्थान ट्रस्टच्या जागेवरील अतिक्रमण हटविण्यासाठी कायदेशीर संघर्ष करणारे ट्रस्टचे सदस्य व सामाजिक कार्यकर्त्याचे नगरसेवकासह इतर दहा ते बारा जणांनी अपहरण करून त्याला बेदम मारहाण केली.गुरुवारी (दि.२६) सकाळी साडेअकरा वाजेच्या सुमारास पारनेर येथे ही घटना घडली.
याप्रकरणी पारनेर पोलिस ठाण्यात सुनील भाऊसाहेब चौधरी (वय ४१, रा. डिकसळ, पारनेर) यांनी दिलेल्या फिर्यादीवरून पारनेर नरगरपंचायतीचा नगरसेवक युवराज कुंडलिक पठारे, त्याचा भाऊ यशवंत ऊर्फ आबा कुंडलिक पठारे, बाळासाहेब पठारे, कुंडलिक पठारे, युवराज याची पत्नी यांच्यासह इतर अनोळखी ७ ते ८ जणांविरोधात गुन्हा दाखल करण्यात आला आहे.
चौधरी हे जवळा येथील लोकजागृती सामाजिक संस्थेत काम करत असून ते गणपती देवस्थान ट्रस्टचे सदस्यही आहेत.या ट्रस्टची सुमारे ३६ एकर जमीन पारनेर-सुपा रोडलगत एमएसईबीच्या पॉवर हाऊसजवळ आहे.
त्या जागेत युवराज कुंडलिक पठारे,नामदेव पठारे,बाळासाहेब पठारे व इतरांनी अतिक्रमण केलेले आहे.हे अतिक्रमण काढावे,यासाठी देवस्थानच्या ट्रस्टींनी औरंगाबाद खंडपीठात वर्ष २०१८ मध्ये याचिका दाखल केली होती.
या याचिकेचा निकाल होऊन अतिक्रमण काढण्यासाठी न्यायालयाने जिल्हाधिकारी यांच्या मार्फत पारनेर नगरपंचायतीकडे नोटिसा पाठवल्या होत्या.अतिक्रमण धारकांना सात दिवसांपूर्वी नोटिसा बजावण्यात आल्या होत्या.
नोटीस बजावल्यानंतरही अतिक्रमण न निघाल्याने चौधरी हे २६ डिसेंबर रोजी सकाळी ११:३० वाजता रोजी ट्रस्टचे सचिव सुधीर देवीदास पाठक यांच्या सांगण्यावरून नगरपंचायतीमध्ये मुख्याधिकारी विनय शिपाई यांच्याशी अतिक्रमणाबाबत चर्चा करण्यासाठी गेले होते.
यावेळी तेथे युवराज कुंडलिक पठारे व आणखी दोन जण उपस्थित होते.याप्रसंगी पठारे याने मुख्याधिकारी यांच्यासमोरच चौधरी यांना दमदाटी करत जीवे मारण्याची धमकी दिली,तसेच त्यांना नगरपंचायतीमधील अधिकारी, कर्मचाऱ्यांसमोरच उचलून नेले.नगरपंचायतीसमोर असलेल्या काळ्या रंगाच्या ‘थार’मध्ये चौधरी यांना जबरदस्तीने बसवून पठारे याच्या घरी नेले आणि तेथे कोंडून मारहाण केली.
नगरसेवक पठारे याने चौधरी यांचे अपहरण करून घरी नेल्यानंतर त्यांना जबर मारहाण केली.या मारहाणीत चौधरी यांच्या तोंडाला,डोक्याला, उजवा हात, पाय व छातीला मार लागला.दरम्यान, या घटनेबाबत पोलिसांना माहिती मिळाली तेव्हा पोलिस पठारे याच्या घरी पोहोचले.
यावेळी मारहाण करणाऱ्यांनी चौधरी यांनी घरात चोरी केली असल्याचे पोलिसांना सांगितले.यावेळी चौधरी हे पोलिस स्टेशनला आले.त्यानंतर त्यांनी मारहाण करणाऱ्यांविरोधात फिर्याद दाखल केली.याप्रकरणी पोलिस निरीक्षक समीर बारवकर हे पुढील तपास करत आहेत.
