तालुक्यातील चासनळी येथील गोदावरी नदी पात्रात पांढऱ्या कपड्यात एका बालकाला बांधून फेकून दिले होते.या मृत बालकाची ओळख पटवण्यात पोलिसांना यश आले असून मृत बालक हा नाशिक जिल्ह्यातील निफाड साकुरेमिग गावातील असल्याची माहिती समोर आली आहे.
पोलिस आता संबंधीत बालकाचा मृत्यू कसा झाला,त्याचा मृतदेह चासनळीच्या गोदा पात्रात का फेकला याचा तपास करत आहेत.माणुसकीला काळीमा फासणारी घटना शुक्रवार (दि. २०) डिसेंबर रोजी चासनळी शिवारात उघडकीस आल्यानंतर कोपरगाव तालुक्यात एकच खळबळ उडाली होती.
अखेर चार दिवसांच्या पोलिस तपासानंतर पांढऱ्या कपड्याच्या गाठोड्यात बांधलेल्या मयत चिमुकल्याची ओळख पटली असून आरोपींना लवकरच अटक होण्याची शक्यता आहे.याप्रकरणाच्या तपासाचे आव्हान तालुका पोलिसांसमोर होते.
वरिष्ठ पोलीस अधिकारी आणि तालुका पोलीस ठाण्याचे पोलीस निरीक्षक संदीप कोळी यांच्या मार्गदर्शनाखाली पोलिसांनी परिश्रम घेऊन त्या चिमुकल्याच्या मृतदेहाची ओळख पटवली असून त्याच्या नातेवाईकांचा शोध ही लावण्यात आला आहे.
कार्तिक ज्ञानेश्वर बदादे (वय ४) असे मयत चिमुकल्याचे नाव असून तो साकुरेमिंग (ता. निफाड जि. नाशिक) येथील रहिवासी असल्याची माहिती समोर आली आहे.मयत कार्तिक बालवाडीत शिक्षण घेत होता.तो दोन महिन्यापासून त्याच्या आई सोबत राहत असल्याची माहिती त्याच्या वडिलांनी दिली आहे.
मयत कार्तिकचा मृतदेह त्याच्या वडिलांच्या ताब्यात देण्यात आला आहे.मात्र, कार्तिकचा मृतदेह नदीत कसा आला ? नेमकं कोणी गाठोड्यात बांधून त्याचा मृतदेह नदीत आणून टाकला ? कार्तिक आई सोबत राहत असल्याने संशयाची सूई आई भोवती फिरत असल्याने पोलिस तपासात नेमकं काय निष्पन्न होतं ? याकडे सर्वांचे लक्ष लागले आहे.
