बुधवारी (४ डिसेंबर) दुपारी १२ ते एक वाजण्याच्या दरम्यान अहिल्यानगर मधील सावेडी उपनगरातील गुलमोहर रस्त्यावरील वसंत अपार्टमेंटमधील फ्लॅट चोरट्यांनी भर दिवसा फोडून सुमारे साडेतीन तोळ्यांचे सोन्याचे दागिने, ६२ हजारांची रोकड असा सुमारे एक लाख ३७ हजारांचा ऐवज लंपास केल्याची घटना घडली.
याप्रकरणी बुधवारी सायंकाळी तोफखाना पोलीस ठाण्यात गुन्हा दाखल करण्यात आला आहे.तुषार नारायण गाडे (वय ४२) यांनी याबद्दल फिर्याद दिली आहे.ते एका हॉटेलमध्ये मॅनेजर म्हणून नोकरी करत आहेत.
बुधवारी सकाळी आठच्या सुमारास त्यांची पत्नी सारीका कामाकरिता व मुलगी शाळेसाठी घरातून बाहेर गेल्या होत्या.तुषार दुपारी १२ वाजता हॉटेलवर कामाकरिता गेले.त्यांनी जाताना फ्लॅटच्या दरवाजाचा कडीकोयंडा व कुलूप तसेच लोखंडी सेफ्टी दरवाजा कडीकोयंडा व कुलूप लावून बंद केला होता.
दुपारी एक वाजता तुषार यांची मुलगी घरी आली असता तिला कुलूप तुटलेले दिसले.तसेच घरातील सामानाची उचकापाचक झालेली दिसून आली.तिने तिच्या वडिलांना (तुषार) यांना फोन करून माहिती दिली.
तुषार यांनी घरात पाहणी केली असता त्यांच्या कपाटातील १० ग्रॅमची सोन्याची चेन, १० ग्रॅमचे ब्रेसलेट, पाच ग्रॅमचे कानातले, १ ग्रॅमची मुरणी, सहा ग्रॅमच्या साखळ्या व तीन ग्रॅमची अंगठी असे सुमारे साडेतीन तोळ्यांचे दागिने आणि ६२ हजार रुपयांची रोकड असा एक लाख ३७ हजारांचा ऐवज लंपास केला आहे.तुषार यांनी पोलिसात फिर्याद दिल्यावर तोफखाना पोलिसांनी घटनास्थळी भेट दिली असून याबाबत अधिक तपास पोलीस करत आहेत.
अशीच दुसरी चोरीची एक घटना सर्जेपुरात घडली.सर्जेपुर चौकातील हॉटेल मिलिंद समोरील ग्रीन मार्केट नावाचे किराणा दुकान चोरट्यांनी फोडून रोकड व किराणा साहित्य असा नऊ हजारांचा ऐवज चोरून नेला.
हि घटना २८ नोव्हेंबर रोजी रात्री ११ ते २९ नोव्हेंबर रोजी सकाळी साडेसातच्या दरम्यान घडली असून याप्रकरणी बुधवारी (४ डिसेंबर) तोफखाना पोलीस ठाण्यात गुन्हा दाखल झाला आहे.अमोल टिल्लू गायकवाड (वय ४२ रा. कॅम्प कॉलनी, सर्जेपुरा) यांनी हि फिर्याद दिली आहे.या घटनेचा अधिक तपास पोलिस करत आहेत.
