बनावट आधार कार्डचा वापर करून खरेदी केलेल्या सीमकार्डद्वारे व्यापाऱ्यास जीवे मारण्याची धमकी देऊन खंडणी मागणाऱ्या दोघांना स्थानिक गुन्हे शाखेच्या पथकाने जेरबंद केले आहे.अजय अरूण साळवे (वय ४२ रा. माधवबाग, आलमगीर, भिंगार), पवन प्रमोद उघडे (वय २४, रा. सदर बाजार, भिंगार) अशी त्यांची नावे आहेत.
याबाबत अधिक माहिती अशी, शहरातील व्यापारी किरण मोहनलाल राका (वय ५६, रा. आदर्श कॉलनी, अहिल्यानगर) हे दि.१४ डिसेंबर रोजी सर्जेपुरा येथून घरी जात असताना अज्ञात आरोपींनी मोटार सायकलवर येऊन, फिर्यादीस अडवून, ‘भाई का फोन आयेगा उठालो’ असे म्हणुन निघुन गेले.त्यानंतर फिर्यादीच्या मोबाईलवर मेसेज पाठवून जीवे मारण्याची धमकी दिली.याबाबत तोफखाना पोलीस ठाण्यात गुन्हा दाखल करण्यात आलेला आहे.
गुन्हा दाखल झाल्यावर पोलीस अधिक्षक राकेश ओला यांनी स्थानिक गुन्हे शाखेचे पो.नि. दिनेश आहेर यांना या गुन्हयांचा समांतर तपास करण्याच्या सूचना दिल्या होत्या.त्यानुसार पो.नि. आहेर यांनी स्थानिक गुन्हे शाखेतील पोलिस उपनिरीक्षक तुषार धाकराव व पोलीस अंमलदार संदीप पवार, संतोष खैरे, सागर ससाणे, रविंद्र घुंगासे, मेघराज कोल्हे, प्रशांत राठोड, महादेव भांड यांचे पथक नेमून तपास सुरु केला.
तपास पथकाने घटना ठिकाणचे सीसीटीव्ही फुटेज व तांत्रीक विश्लेषणाच्या आधारे आरोपींचा नगर शहरामध्ये शोध घेत असताना पथकास गोपनीय माहिती मिळाली की, नमूद गुन्हयातील संशयीत आरोपी हे रामवाडी रोड, तारकपूर येथे विना क्रमांकाच्या अॅक्टीव्हा मोटारसायकलसह थांबलेले आहेत.मिळालेल्या माहितीच्या आधारे तपास पथकाने रामवाडी रोडवर संशयीत विनाक्रमांकाच्या अॅक्टीव्हा गाडीवरील अजय अरूण साळवे व पवन प्रमोद उघडे यांना ताब्यात घेतले.
या दोघांची झडती घेऊन, त्यांच्या ताब्यातून ८२ हजार रुपयांचा मुद्देमाल त्यात एक ग्रे कलरची अॅक्टीव्हा, नोकीया व जिओ कंपनीचे मोबाईल, विजय अरूण नवगिरे याचे आधारकार्ड पॅनकार्ड व बँक पासबुक, एक रबरी स्टॅम्प, अनोळखी इसमाचे फोटो असा मद्देमाल जप्त केलेला आहे.
अजय साळवे याच्याकडे विचारपुस केली असता,त्याने खोटया कागदपत्रांचा वापर करून दिपक राजु भुजबळ। (रा. घासगल्ली, रोड, शिवाजीनगर) या नावाने बनावट आधारकार्ड तयार केले.त्या बनावट आधारकार्डच्या आधारे वेगवेगळी कागदपत्रे तयार केली.अजय साळवे याने व्यापारी किरण राका यांच्याकडून खंडणी वसुल करण्याच्या उद्देशाने २० नोव्हेंबर रोजी बनावट कागदपत्रावरून त्याने एअरटेल कंपनीचे नवीन सिमकार्ड घेतले.
१४ डिसेंबर रोजी रात्री ८ ते ९ वाजण्याच्या सुमारास पवन प्रमादे उघडे याच्यासह अॅक्टीव्हा मोटार सायकलवर जाऊन फिर्यादीस अडवून धमकावले व नंतर त्यांच्याकडील नोकीया मोबाईलद्वारे फिर्यादी यांना खंडणी मागण्याकरीता धमकी दिल्याची माहिती सांगितली. ताब्यातील या दोघांना अधिक तपासकामी तोफखाना पोलीस स्टेशन येथे मुद्देमालासह हजर करण्यात आले आहे.
