संगमनेर तालुक्यातील संगमनेर खुर्द, नर्सरी,धांदरफळ, रहिमपूर, जोर्वे, निमज, शेळकेवाडी आदी गावांमधून रात्रीच्या वेळी मोठ्या प्रमाणात अवैध वाळू उपसा होत आहे. मात्र याकडे महसूल विभागाचे दुर्लक्ष झाल्याचा आरोप केला जात आहे.
गेल्या काही दिवसांपासून महसूल विभागाच्या कारवाया थंड झाल्याचे दिसून येत आहे.याचबरोबर घारगाव येथील मुळा नदी पात्रातून देखील अवैधरित्या वाळू उपसा केला जात आहे.तर अकलापूर परिसरातील शेळकेवाडी परिसरात रात्रीच्या वेळी चोरटी वाळू वाहतूक होत आहे.
खांडगाव फाटा परिसरात शनिवार संध्याकाळी आठ वाजेच्या सुमारास अवैध वाळू वाहतूक करणारी पिकअप थेट दुभाजकावर चढली आहे.मात्र आता यावरून अवैध वाळू वाहतुकीकडे महसूल विभागाचे दुर्लक्ष असल्याचे पाहावयास मिळत आहे.
संगमनेर येथील प्रवरा नदीपात्रातून अवैध वाळू उपसा सुरूच असून दिवसाढवळ्या वाळू काढली जात आहे.शनिवारी संध्याकाळी आठ वाजेच्या सुमारास खांडगाव फाटा येथे विनाक्रमांक पिकअप पलट्या खात थेट दुभाजकावर चढली.
यावेळी पिकअपमध्ये वाळू काढण्यासाठी लागणारे खोरे देखील होते.पिकअप दुभाजकावर चढल्याचे समजताच नागरिकांनी घटनास्थळी मोठी गर्दी केली होती.तर वाळूतस्करांची पिकअप काढण्यासाठी चांगलीच धावपळ सुरू होती.
दरम्यान दैव बलवत्तर असल्याने पिकअपमधील सर्वजण बालंबाल बचावले आहे.दरम्यान, प्रवरा नदीपात्रातून दिवसाढवळ्या वाळू काढली जात आहे.मात्र याकडे महसूल विभागाचे अधिकारी का दुर्लक्ष करत आहेत ? असा प्रश्नही आता निर्माण झाला आहे.
सध्या महसूल विभागाचे अवैध वाळू वाहतुकीकडे पूर्णपणे दुर्लक्ष झाले आहे.याचाच फायदा वाळूतस्करांनी उचलला आहे. त्यामुळे आता तालुक्यात सुरू असलेली अवैध वाळू वाहतूक कधी बंद होणार आहे,असा प्रश्नही आता निर्माण झाला आहे.
