भरधाव वेगातील कारने स्कुटीला धडक दिल्यामुळे स्कुटीवरील महिला रस्त्यावर पडून गंभीर जखमी होवून मयत झाल्याची घटना नगर मनमाड महामार्गावर एमआयडीसी परिसरात असलेल्या दुध डेअरी चौकात बुधवारी (दि.२७) दुपारी ४.३० च्या सुमारास घडली आहे. सरिता शरद मेहेर (वय ६४, रा. सारसनगर) असे या मृत महिलेचे नाव आहे.
मयत सरिता या स्कुटीवर दातांच्या दवाखान्यात तपासणी साठी नगर मनमाड महामार्गाने विळद घाटाच्या दिशेने चाललेल्या होत्या.दुपारी ४.३० च्या सुमारास एमआयडीसी परिसरात असलेल्या दूध डेअरी चौकात भरधाव वेगातील कारने त्यांच्या स्कुटीला धडक दिली.
त्यामुळे त्या रस्त्यावर पडून गंभीर जखमी झाल्या. परिसरातील नागरिकांनी रुग्णवाहिका बोलावून त्यांना उपचारासाठी जिल्हा शासकीय रुग्णालयात पाठविले. तेथील मेडिकल ऑफिसर डॉ. बटूळे यांनी त्यांची तपासणी केली असता त्या उपचारापूर्वीच मयत झाल्याचे आढळून आले.
याबाबतची माहिती त्यांनी दवाखाना ड्युटीवर असलेले तोफखाना पोलिस ठाण्यातील स. फौ. बोरुडे यांना दिली. सदर माहिती त्यांनी एमआयडीसी पोलिसांना कळविली. या माहिती वरून पोलिसांनी आकस्मात मृत्यूची नोंद केली आहे.
नातेवाईकांच्या फिर्यादी नंतर कार चालकावर गुन्हा दाखल केला जाणार असल्याचे पोलिसांनी सांगितले.मयत सरिता मेहेर यांच्या पश्चात १ मुलगा, १ विवाहित मुलगी, सून, जावई, नातवंडे असा परिवार आहे. व्यावसायिक सौरभ शरद मेहेर यांच्या त्या मातोश्री होत्या.
