Ahilyanagar News : बदलत्या काळात सध्या बहुतेक लोक वर्क फ्रॉम होम म्हणजेच घरातूनच काम करत आहेत. मात्र सतत कॉम्प्युटर स्क्रीन आणि लॅपटॉपच्या समोर बसून अनेकांना डोके, मन, डोळे आदींचे आजार जडतात. यात मुख्य म्हणजे डोळ्यांचे विकार मोठ्या प्रमाणात वाढत आहेत. सुरुवातीला डोळ्यांचा जडपणा आणि जळजळ होऊ लागते, तसेच डोळ्यातून पाणी देखील येते.
बऱ्याच वेळा कॉम्प्युटर स्क्रीनसमोर बसून काम केल्याने किंवा जास्त काळ मोबाईल हाताळल्याने या सर्व समस्यांना सामोरे जावे लागते. पण या साऱ्या समस्यांपासून सुटका मिळवण्यासाठी डोळ्यांना विश्रांतीची गरज असते आणि असेच काही सोपे व्यायाम करून आपण आपल्या डोळ्यांच्या या त्रासापासून सुटका मिळवू शकतो.
कोणत्याही सुखासनात स्वेच्छेने बसा. तळहात एकत्रितरीत्या चोळा, जेणेकरून उष्णता जाणवेल. आता डोळे बंद करा आणि तळहात डोळ्यांवर ठेवा. डोळ्यांना उष्णता जाणवेल. तळहात थंड झाल्यावर ही क्रिया पुन्हा करा. अशा प्रकारे हातातून निघणारी ही शक्ती आपल्याला जाणवेल. असे आपल्याला किमान तीन वेळा करायचे आहे.
समोर पाय लांब करून बसा. दोन्ही हात खांद्यासमोर पसरवा. मूठ बंद करा, अंगठा वरील बाजूस करा. डोक्याला स्थिर करा. आता डोळ्यांनी आधी डावा अंगठा बघा, नंतर दृष्टीला नाकाच्या मध्यभागी आणा. यानंतर उजव्या हाताच्या अंगठ्यावर दृष्टी लावा नंतर नाकाच्या मध्यभागी आणा. ही क्रिया किमान १० ते १५ वेळा आवश्यकतेनुसार करा आणि डोळ्यांना काही काळ विश्रांती द्या.
आरामशीर बसा. आता खांद्यांच्या समांतर डाव्या हाताला डोळ्यांच्या समोर आणि उजव्या हाताला उजवीकडे घेऊन जा. खांद्याच्या उंचीच्या बरोबर अंगठा बाहेर काढून मूठ बंद करून स्थिर ठेवा. आता डोके न हलवता समोरच्या अंगठ्याला बघा. नंतर उजव्या अंगठ्याला बघा. अशा प्रकारे १० ते १५ वेळा बघा आणि हातांच्या स्थितीला बदलून डाव्या हाताला डावीकडे आणि उजव्या हाताला पुढील बाजूस करा आणि डोळ्यांना विश्रांती द्या.
आरामशीर बसा. उजवा हात खांद्याच्या सरळ उचलून समोरच्या बाजूने ओढून धरा. मूठ बंद करा, अंगठा बाहेर बाजूस वर ठेवा. नजर अंगठ्याावर स्थिर करा हळूवारपणे अंगठा जवळ घेत नाकाला स्पर्श करा आणि पुन्हा लांब नेत हाताला ताणून धरा.
परत अंगठ्याला नाकाच्या जवळ घ्या. अशा प्रकारे ही क्रिया पाच वेळा करा. त्याच बरोबर सकाळी उठल्यावर तोंड धुताना आपल्या तोंडात पाणी भरून ठेवा आणि डोळ्यांना उघडून पाण्याचे शिंतोडे मारा. असे १, २ वेळा करावे. नंतर तोंडातून पाणी काढून तळहाताला डोळ्यांच्या वर ठेवा.
